ബിഹാര്‍ തെരഞ്ഞെടുപ്പ് ബഹിഷ്‌ക്കരണം; എല്ലാ വഴികളും പരിഗണിക്കുമെന്ന് കോണ്‍ഗ്രസ്

ന്യൂഡല്‍ഹി: ബിഹാറില്‍ പ്രത്യേക തീവ്ര വോട്ടര്‍ പരിഷ്‌കരണത്തിനെതിരെയുള്ള പ്രതിഷേധത്തിന്റെ ഭാഗമായി നിയമസഭ തെരഞ്ഞെടുപ്പ് ബഹിഷ്‌ക്കരണം ഉള്‍പ്പെടെയുള്ള എല്ലാ വഴികളും പരിഗണിക്കുമെന്ന് കോണ്‍ഗ്രസ്. ബിഹാറില്‍ സഖ്യമായി മത്സരിക്കുന്ന ഇന്‍ഡ്യ സഖ്യത്തിലെ കക്ഷികളെല്ലാവരും ചേര്‍ന്ന് വിഷയം ചര്‍ച്ച ചെയ്ത് ഇക്കാര്യത്തില്‍ തീരുമാനമെടുക്കുമെന്ന് സംസ്ഥാനത്തിന്റെ ചുമതലയുള്ള എഐസിസി നേതാവ് കൃഷ്ണ അല്ലാവരു പറഞ്ഞു.

പത്യേക തീവ്ര വോട്ടര്‍ പരിഷ്‌കരണം തെരഞ്ഞെടുപ്പ് പിടിച്ചെടുക്കുന്നതിന് വേണ്ടിയാണെന്ന് ഒന്നാം ദിവസം മുതല്‍ ഇന്‍ഡ്യ സഖ്യം പറഞ്ഞിട്ടുണ്ട്. അത് കൊണ്ട് തന്നെ എല്ലാ വഴികളും സഖ്യം പരിശോധിക്കും. ഒരു കാര്യം വ്യക്തമാണ്, അത് ബിഹാറി ജനതയുടെ വോട്ടുകള്‍ തട്ടിയെടുക്കപ്പെടുന്നുവെന്നും കൃഷ്ണ അല്ലാവരു പറഞ്ഞു.

ബിഹാര്‍ തെരഞ്ഞെടുപ്പ് ബഹിഷ്‌കരിക്കുമെന്ന മുന്നറിയിപ്പുമായി ആര്‍ജെഡി നേതാവും മുന്‍ ഉപമുഖ്യമന്ത്രിയുമായ തേജസ്വി യാദവാണ് ആദ്യം രംഗത്തെത്തിയത്. തെരഞ്ഞെടുപ്പ് ബഹിഷ്‌കരിക്കുന്നത് പരിഗണനയിലുണ്ടെന്ന് തേജസ്വി യാദവ് പറഞ്ഞു. തെരഞ്ഞെടുപ്പ് കമ്മീഷന്‍ ഉത്തരവുകള്‍ സ്വീകരിക്കുന്നത് ബിജെപിയില്‍ നിന്നാണെന്നും അത്തരമൊരു സാഹചര്യത്തില്‍ തെരഞ്ഞെടുപ്പ് നടത്തുന്നത്

അര്‍ത്ഥശൂന്യമാണെന്നും അദ്ദേഹം പറഞ്ഞു. ബിഹാര്‍ നിയമസഭാ തെരഞ്ഞെടുപ്പ് ബഹിഷ്‌കരിക്കുന്നത് പ്രതിപക്ഷം പരിഗണിക്കുമോ എന്ന മാധ്യമങ്ങളുടെ ചോദ്യത്തിന് മഹാസഖ്യത്തിന്റെ സഖ്യകക്ഷികളുമായി ഇക്കാര്യം ചര്‍ച്ച ചെയ്യുമെന്ന് തേജസ്വി പറഞ്ഞു.

'വ്യാജ വോട്ടര്‍ പട്ടിക ഉപയോഗിച്ച് തെരഞ്ഞെടുപ്പ് നടത്തി ഭരണം പിടിക്കാനാണ് ബിജെപി ആഗ്രഹിക്കുന്നതെങ്കില്‍ പിന്നെ തെരഞ്ഞെടുപ്പ് നടത്തുന്നതിന്റെ അര്‍ത്ഥമെന്താണ്? ബഹിഷ്‌കരണത്തെക്കുറിച്ച് ആലോചിക്കേണ്ടിയിരിക്കുന്നു. അന്തിമ തീരുമാനം സഖ്യ കക്ഷികളുമായി കൂടിയാലോചിച്ചായിരിക്കും. നേരത്തെ വോട്ടര്‍മാരാണ് സര്‍ക്കാരിനെ തെരഞ്ഞെടുത്തിരുന്നത്. ഇപ്പോള്‍ സര്‍ക്കാര്‍ വോട്ടര്‍മാരെ തെരഞ്ഞെടുക്കുന്ന സ്ഥിതിയായി.'- തേജസ്വി യാദവ് പറഞ്ഞു.

അതേസമയം, ബിഹാറിലെ തീവ്ര വോട്ടര്‍പട്ടിക പരിഷ്‌കരണത്തിന്റെ ആദ്യഘട്ടം ഇന്ന് പൂര്‍ത്തിയാകും. യോഗ്യരായ ഒരു വോട്ടറെയും പുറത്താക്കുകയോ അയോഗ്യരായ ആരെയും ഉള്‍പ്പെടുത്തുകയോ ചെയ്യില്ലെന്ന് കേന്ദ്ര തെരഞ്ഞെടുപ്പ് കമ്മീഷന്‍ വ്യക്തമാക്കി. വിഷയം ഉന്നയിച്ച് പ്രതിപക്ഷ പാര്‍ട്ടികള്‍ ലോക്സഭയില്‍ പ്രതിഷേധിച്ചു. ബഹളത്തെ തുടര്‍ന്ന് ലോക്സഭ രണ്ടുമണി വരെ നിര്‍ത്തിവെച്ചു. രണ്ടുമണിക്ക് സഭ കൂടിയെങ്കിലും ബഹളം തുടര്‍ന്നതോടെ സഭ ഇന്നത്തേക്ക് പിരിഞ്ഞു. രാജ്യസഭയിലും പ്രതിപക്ഷ ബഹളത്തെ തുടര്‍ന്ന് സഭ പിരിഞ്ഞിരുന്നു.

Content Highlights: Congress said the INDIA bloc is considering the boycotting the upcoming Bihar election